በመተከል ዞን የተለያዩ አካባቢዎች በተፈጠሩ የጸጥታ ችግሮች ተሳተፈዋል የተባሉ 358 ተጠርጣሪዎች በቁጥጥር መዋላቸውን የክልሉ ሠላም ግንባታ እና ጸጥታ ቢሮ አስታወቀ

በመተከል ዞን በተለያዩ አካባቢዎች ከተፈጠሩ የጸጥታ ችግሮች ጋር በተያያዘ ተሳተፈዋል የተባሉ እስካሁን 358 የሚሆኑ ተጠርጣሪዎች በቁጥጥር ስር መዋላቸውን የክልሉ ሠላም ግንባታ እና ጸጥታ ቢሮ አስታወቀ፡፡

የቢሮው ኃላፊ አቶ አበራ ባያታ፣ በቅርቡ በመተከል ዞን የተከሰተውን የጸጥታ ችግር ለማረጋጋት እና በቀጥታም ሆነ በተለያዩ መንገዶች በተዘዋዋሪ ተሳትፎ ባደረጉ አካላት ላይ የሕግ የበላይነትን ለማስከበር የክልሉና የፌዴራል መንግስት በትኩረት እየሠሩ መሆናቸውን ገልጸዋል፡፡

ከሰሞኑ በመተከል ዞን ቡለን እና ወምበራ ወረዳ አንዳንድ ቀበሌዎች ከነበረው የጸጥታ ችግር ጋር በተያያዘ አየተሠራ ባለው የሕግ ማስከበር ሥራ የተለያዩ ተሳትፎዎችን አድርገዋል የተባሉ ተጨማሪ 30 ተጠርጣሪዎች በቁጥጥር ስር መዋላቸውን አቶ አበራ ጨምረው ተናግረዋል፡፡

ከዚህ ቀደም በዞኑ የተለያዩ አካባቢዎች በተፈጠሩ ችግሮች ተሳትፎ የነበራቸው 328 ተጠርጣሪዎች በቁጥጥር ስር ውለው እንደነበር ያስታወሱት አቶ አበራ፣ ሰሞኑን በ2ቱ ወረዳዎች እየተሠራ ባለው የሕግ ማስከበር ሥራ ተጨማሪ 30 ሰዎች በህግ ቁጥጥር ስር ውለዋል ብለዋል፡፡

እስካሁን በተሠራው የህግ ማስከበር ሥራም 358 ተጠርጣሪዎች በህግ ቁጥጥር ስር ውለው ጉዳያቸው በህግ እየታዬ እንደሚገኝም አብራርተዋል፡፡

በቁጥጥር ስር የዋሉት ለችግሩ መፈጠረና መባባስ የተለያዩ ተሳትፎ የነበራቸው ናቸው ያሉት አቶ አበራ፣ ጉዳያቸው እየታዬ መሆኑንም አመልክተዋል፡፡

ሰሞኑን በዞኑ ወምበራ ወረዳ የጸጥታ ችግር በተፈጠረባቸው ቀበሌዎች 1 የፖሊስ አባልን ጨምሮ በተለያዩ መንገዶች ተባባሪ ነበሩ ተብለው የተጠረጠሩ 8 ግለሰቦች በሕግ ቁጥጥር ስር ውለዋል ብለዋል፡፡

በተመሳሳይ በቡለን ወረዳ ኤጳር፣ አይጋሊና በዶሬ ቀበሌዎች ተፈጥሮ በነበረው ችግርና ከደረሰው ጉዳት ጋር በተያያዘ በቡለን ማዕከል ሆነው ሲተባበሩ የነበሩ 22 ተጠርጣሪ ግለሰቦች በቁጥጥር እንደዋሉ ገልጸዋል፡፡

መንግስት በሁለቱ ወረዳዎች በንጹኃን ዜጎች ላይ ጉዳት ያደረሱ ኃይሎችን ለመደምሰስና በቀጥታም ሆነ በተለያዬ መልኩ የተሳተፉ አካላትን በሕግ ቁጥጥር ስር ለማዋል እየሠራ ያለውን የሕግ ማስከበር ሥራ አጠናክሮ እንደሚቀጥል አስታውቀዋል፡፡

በመተከል ዞን ሠሞኑን የጸረ-ሠላም ኃይሎች ባደረሱት ጥቃት የንጹኃን ዜጎች ሕይወት ያለፈ ሲሆን፣ ነዋሪዎች ከመኖሪያቸው እንዲፈናቀሉ ምክንያት መሆኑ ይታወሳል፡፡

ኢትዮ ኤፍ ኤም የኢትዮጵያውያን
መስከረም 11 ቀን 2012 ዓ.ም

FacebooktwitterredditpinterestlinkedinmailFacebooktwitterredditpinterestlinkedinmail

Leave a Reply

Your email address will not be published.