የሱዳን ጦር የኢትዮጵያን ድንበር አልፎ ዝርፊያና ትንኮሳዎችን መፈጸም የሚያቆመዉ መቼ ነዉ?

የሱዳን ጦር በየቀኑ የኢትዮጵያን ድንበር አልፎ ዝርፊያና የተለያዩ ትንኮሳዎችን እደረገ መሆኑ ተገልጿል፡፡

በሱዳን ጦር የተፈናቀሉ ኢትዮጵያዉያን አርሶ አደሮችም ለከፍተኛ ችግር መዳረጋቸዉን ለኢትዮ ኤፍ ኤም ተናግረዋል፡፡

አቶ አሰፋ አዛናዉ እና ባለሃብት ፋሲል አሻግሬ በአካባቢዉ በግብርና ስራ ላይ ተሰማርተዉ የሚገኙና የአገርን ኢኮኖሚ የሚደግፉ እንዲሁም ለበርካቶች ስራ እድልን የፈጠሩ ናቸዉ፡፡
ነገር ግን የሱዳን ወታደራዊ ሃይል የኢትዮጵያን ድንበር ጥሶ ገብቶ የደከሙበትን ሰብል ሳይሰበስቡ ከቤት ንብረታቸዉ አፈናቅሏቸዋል፡፡

በዚህም አርሶ አደር አሰፋ 87 በግና ፍየል እንዲሁም እስከ 120 ኩንታል ማሽላ ተወስዶብባቸዋል፡፡ ባለሃብት ፋሲል ደግሞ እስከ 2 ሚሊዮን ብር የሚገመት ንብረትን አጥተዋል፡፡

ባለፈዉ አመት አርሰን ያፈራነዉን ሰብል የሱዳን ጦር በመዘርፉ ለከፍተኛ ችግር ተዳርገናል ብለዋል እነዚህ የአካባቢዉ ነዋሪዎች፡፡

በያዝነዉ የመኸር እርሻ የማናርስ ከሆነም ችግሩ ከእኛ አልፎ በአገር ኢኮኖሚ ላይ ከፍተኛ ተፅዕኖ ስለሚያሳድር መንግስት መፍትሔ ይስጠንም ብለዋል፡፡

ይህ አርሶ አደር ሀሩርና ቆፈኑ ሳይበግረዉ አመቱን ሁሉ በግብርና ስራ ላይ ተሰማርቶ እራሱን፣ ወገኑና አገሩን ለመመገብ የሚታትር ነዉ፡፡

ግን ለፍቶ ያረሰዉን ሰብል ሳይሰበስብ ግማሹ በእሳት ጋይቶበት፣ ከፊሉን ደግሞ በሱዳን ወታደሮች ተነጥቆ የደከመበትን ዉጤት ሳያገኝ መና ቀርቷል፡፡

ይህ ብቻ አይደለም ባለሃብቱም ቢሆን የአገርን ኢኮኖሚ በማገዝ በግብርናዉ ዘርፍ ተሰማርቶ እያለ በሱዳን ወታደር ዝርፊያ ተፈፅሞበታል፡፡

ኢትዮጵያ ወደ ዉጭ ልካ የገቢ ምንጭ ከሚያስገኙላትና ኢኮኖሚዋን ከሚደግፉላት ዘርፎች መካከል ግብርና ቀዳሚዉ ሲሆን በኢትዮ- ሱዳን ድንበር አካባቢ የሚመረቱት የቅባት እህሎች ደግሞ የአንበሳዉን ድርሻ ይይዛሉ፡፡

እናም ለአገር ኢኮኖሚ ምሰሶ የሆነዉ ይህ ለም መሬት በሱዳን እጅ መዉደቁና በአካባቢዉ የሚገኙ አርሶ አደሮች ለሁለት ተከታታይ አመታት የማያርሱ ከሆነ በአገሪቱ ላይ ምን አይነት ጫና ያስከትል ይሆን ስንል የምጣኔ ሀብት ባለሙያ የሆኑት አቶ ያሬድ ሓይለመስቀልን ጠይቀናል፡፡

“አሁን ላይ ኢትዮጵያ ከአለም አቀፉ ማህበረሰብ ከፍተኛ ጫና እየደረሰባት እንደሚገኝ የሚገልፁት አቶ ያሬድ፣ በየቦታዉ የሚፈናቀለዉ አርሶ አደር ሲጨመርበት ደግሞ ችግሩን ከፍ ስለሚደርገዉ መንግስት ለእነዚህ አርሶ አደሮች መፍትሔ ሊሰጥ ይገባል” ብለዋል፡፡

መንግስት በትግራይ ክልል የህግ ማስከበር ዘመቻ እየወሰደ ባለበት ወቅት፣ ድንበር አልፎ የገባዉ የሱዳን ጦር አሁንም ድረስ በተለያዩ አካባቢዎች እየገፋ እንደሚገኝ የአካባቢዉ ነዋሪዎች ለኢትዮ ኤፍ ኤም ተናግረዋል፡፡

ለመሆኑ የሱዳን ጦር ምን ያህል ቦታ ነዉ የተቆጣጠረዉ በአካባቢዉ? ያለዉስ የፀጥታ ሁኔታ ምን ይመስላል? ስንልም የምዕራብ ጎንደር ዞን ዋና አስተዳዳሪን አቶ ደሳለኝ ጣሰዉን የጠየቅን ሲሆን ከሁመራ ድንበር እስከ ቋራ ድረስ ያለዉና እስከ 5 መቶ ኪሎሜትር ባላ ድንበር በሱዳን ሰራዊት ቁጥጥር ስር ይገኛል ነዉ ያሉት፡፡

ከዚህ ቀደም የችግሩ ሰለባ የሆኑት አርሶ አደሮች ቁጥር 450 እንደነበሩ የሚናገሩት የዞኑ ዋና አስተዳዳሪ አቶ ደሳለኝ፤ አሁን ላይ የሱዳን ሰራዊት በየቀኑ የተለያዩ ትንኮሳዎችን ስለሚያደርግ በርካቶች እየተፈናቀሉ ነዉ ብለዋል፡፡

ችግሩ የዞኑና የአርሶ አደሮቹ ብቻ ሳይሆነ የአገሪቱ በመሆኑ የክልሉና የፌደራሉ መንግስት በጋራ በመሆን ለችግሩ መፍትሄ እንዲያመጡም አስተዳዳሪዉ ጠይቀዋል፡፡

ለመሆኑ የኢትዮጵያ መንግስት ችግሩን ለመፍታት ምን እሰራ ይሆን ለሚለዉ ጥያቄም የዉጭ ጉዳይ ሚኒስቴር ቃል አቀባይ አምባሳደር ዲና ሙፍቲ ጦርነት አዋጭ ባለመሆኑ አሁንም የኢትዮጵያ ምርጫ ዲፕሎማሲ ነዉ ብለዋል፡፡

የሱዳን ጦር ከ6 ወር በፊት የኢትጵያን ድንበር አልፎ የገባ ሲሆን የኢትዮ- ሱዳን የየብስ ትራንስፖርትም ክፍት መሆኑ ተነግሯል፡፡

በአባቱ መረቀ
ሰኔ 07 ቀን 2013 ዓ.ም

FacebooktwitterredditpinterestlinkedinmailFacebooktwitterredditpinterestlinkedinmail

Leave a Reply

Your email address will not be published.