የኢትዮጵያ አካል ጉዳተኞች መብት ድንጋጌ ሊወጣ ዝግጅት ላይ መሆኑን ከ 2 ዓመታት በፊት ተገልጾ ነበር፡፡
የኢትዮጵያ አካል ጉዳተኞች መብት ድንጋጌ ረቂቅ ለመንግስት ከ5 ወራት በፊት ሊቀርብ ተዘጋጅቶ ነበር ያሉት በሴቶች እና ማህበራዊ ጉዳይ ሚኒስቴር የአካል ጉዳተኞች ጉዳይ መሪ ስራ አስፈጻሚ የሆኑት አቶ አሳልፈዉ አህመዲን ናቸዉ፡፡
ከተለያዩ ማህበራት ረቂቁን በደንብ ማየት ያስፈልገናል በሚል በተነሳ ጥያቄ መሰረት ረቂቁ ለመንግስት ሳይቀርብ የተወሰኑ ወራትን ወስዷል ነዉ ያሉት ፡፡
ከፌዴሬሽኑ እና ይህን ጉዳይ ካዋቀረዉ ኮሚቴ ጋር በጋራ ስንሰራ ቆይተናል ያሉት አቶ አሳልፈዉ በአሁኑ ሰዓት የመጨረሻዉን ቅርጽ የማስያዝ ስራ እየሰራን ነዉ ብለዋል፡፡
ረቂቁ በጣም ሰፊ እና ለመንግስትም ሲቀርብ ብዙ ዉይይት የሚደረግበት በመሆኑ በደንብ መመልከቱ አስፈላጊ ሆኖ ስለተገኘ ሊዘገይ ችሏል ነዉ ያሉት፡፡
ስራ አስፈጻሚዉ አክለዉም ረቂቁ የትምህርት ጉዳይ ፣ከስራ ቅጥር ጋር ተያይዞ ስላለ ኮታ እንዲሁም የግብር አከፋፈል ስርዓትን ጨምሮ የተለያዩ ጉዳዮችን በዉስጡ የያዘ መሆኑን ገልጸዉ ይህን ጉዳይ ከሚመለከታቸዉ ተጠሪ ተቋማት ጋርም በትብብር የመስራት ስራ ያስፈልጋል ብለዋል፡፡
መብትን ከማስፋት እንዲሁም ተጠያቂነትን ከማስፈን ጋር ተያይዞ በርካታ ጉዳዮችን የያዘ የህግ ማዕቀፍ ስለሆነ ነዉ ሰፊ ጊዜን የወሰደዉ ነገርግን ይህ ዓመት ሳይጠናቀቅ ረቂቁ ለመንግስት ይቀርባል ብለዋል፡፡
እስከዳር ግርማ
ሚያዝያ 16 ቀን 2015 ዓ.ም
