ባለፉት 6 ወራትም 7ሺህ አዳዲስ ሰዎች በኤች አይ ቪ መያዛቸዉ ተገልጿል፡፡
ባለፉት 6 ወራት በክልሉ ከተደረገ 2 ሚሊየን አከባቢ ምርመራ 7ሺህ ሰዎች ቫይረሱ በደማቸዉ ዉስጥ ተገኝቷል፡፡
ከጣቢያችን ጋር ቆይታ ያደረጉት የኦሮሚያ ክልል ጤና ቢሮ ምክትል ሃላፊ ዶ/ር ጉሻ በለኮ በክልሉ ወደ 158 ሺህ ሰዎች የኤች አይ ቪ ቫይረስ በደማቸዉ ዉስጥ ይገኛል ተብሎ እንደሚገመት ነግረዉናል፡፡
ከእነዚህ መካከል ደግሞ ወደ 126ሺህ6መቶ80 የሚሆኑት የኤች አይ ቪ መድሃኒት ተጠቃሚ መሆናቸዉን አንስተዋል፡፡
በክልሉ ያለዉ የስርጭት ምጣኔ ወደ 0.6 በመቶ ነዉ ያሉት ዶ/ር ጉሻ፤ በከተሞች አከባቢ ግን ወደ 3 በመቶ ከፍ እንደሚል ነግረዉናል፡፡
የኤች አይ ቪን መድሃኒት በተመለከተ የሚደርሰዉ የመድሃኒት አቅርቦት ‹‹ከሞላ ጎደል ጥሩ ነዉ››ያሉት ሃላፊዉ አልፎ አልፎ የመድሃኒት መቆራረጥ ይከሰታል ብለዉናል፡፡
‹‹ኤች አይ ቪ በጣም ሴንሴቲቭ ነገር ነዉ›› ያሉት ሃላፊዉ ፤ መድሃኒቱን ለሁለት ቀናት እንኳን ማቋረጥ ምን ያህል ዋጋ እንደሚያስከፍል የሚታወቅ ነዉ ብለዋል፡፡
በ2015 የመጀመሪያዉ ግማሽ ዓመት የመድሃኒት አቅርቦት መቆራረጥ አስቸጋሪ ሆኖ ነበር ያሉት ዶ/ር ጉሻ ፤በዚህኛዉ ዓመት ግን ብዙም ችግር እንዳልነበር ነግረዉናል፡፡
በክልሉ እንደ አዳማ፣ ሻሸመኔ፣ ጅማ እና ቢሾፍቱ ያሉ አከባቢዎች ላይ የስርጭት ምጣኔዉ ከ2-3 በመቶ ከፍ ያለ መሆኑንም ነግረዉናል፡፡
በእስከዳር ግርማ
ጥር 23 ቀን 2016 ዓ.ም
