ኢትዮጵያ የአፍሪካ ከ20 ዓመት በታች ዋንጫ ማጣሪያ ጨዋታ የምታደርግባቸው ቀናት ይፋ ሆኑ

የኢትዮጵያ ከ20 ዓመት በታች ብሔራዊ ቡድን የአፍሪካ ዋንጫ ማጣሪያ የሚያደርግባቸው ቀናት ዛሬ ይፋ ተደርገዋል።

24ኛው የአፍሪካ ዋንጫ ከ20 ዓመት በታች የሴካፋ ዞን ማጣሪያ በታንዛንያ ከመስከረም 26 እስከ ጥቅምት 10 ቀን 2017 ዓ.ም ይካሄዳል።

ኢትዮጵያ በምድብ 2 ከዩጋንዳ፣ ብሩንዲና ደቡብ ሱዳን ጋር ተደልድላለች።
የምስራቅና መካከለኛው አፍሪካ የእግር ኳስ ማህበራት ምክር ቤት(ሴካፋ) የማጣሪያ መርሐ ግብሩን ዛሬ ይፋ አድርጓል።

ኢትዮጵያ የመጀመሪያ ጨዋታዋን መስከረም 27 ቀን 2017 ዓ.ም ከዩጋንዳ ጋር ታከናውናለች።

ብሔራዊ ቡድኑ መስከረም 29 ቀን 2017 ዓ.ም ከደቡብ ሱዳን እንዲሁም ጥቅምት 1 ቀን 2017 ዓ.ም ከብሩንዲ ጋር ይጫወታል።

አሰልጣኝ ስዩም ከበደ በማጣሪያ ውድድሩ የሚሳተፈውን የኢትዮጵያ ከ20 ዓመት በታች ብሔራዊ ቡድን ዋና አሰልጣኝ ሆነው መሾማቸውን የኢትዮጵያ እግር ኳስ ፌዴሬሽን ትናንት ይፋ ማድረጉ ይታወቃል።

አሰልጣኝ ስዩም ብሔራዊ ቡድኑ ለማጣሪያ ውድድሩ ለሚያደርገው ዝግጅት ለ38 ተጫዋቾች የመጀመሪያ ዙር ጥሪ አድርገዋል።

ጥሪ የተደረገላቸው ተጫዋቾች ከዛሬ ጀምሮ ዝግጅታቸውን እንደሚጀምሩ ፌዴሬሽኑ አመልክቷል።

በሴካፋ ዞን ማጣሪያ ለፍጻሜ የሚደርሱ ሁለት ሀገራት በአፍሪካ ከ20 ዓመት በታች ዋንጫ ያልፋሉ።

በአፍሪካ ከ20 ዓመት በታች ዋንጫ 12 ሀገራት ይሳተፋሉ።

በጋዲሳ መገርሳ

መስከረም 7 ቀን 2017 ዓ.ም

FacebooktwitterredditpinterestlinkedinmailFacebooktwitterredditpinterestlinkedinmail

Leave a Reply

Your email address will not be published. Required fields are marked *