አገልግሎቱ 9 መቶ 70 አይነት መድኃኒቶችን በ19 ቅርንጫፎቹ ለመንግስት የጤና ተቋማት ያሰራጫል።
ከእነዚህ መድኃኒቶች ውስጥ 2መቶ3 የሚሆኑት በአገር ውስጥ የተመዘገበ አንድም አቅራቢ እንደሌላቸው አገልግሎቱ ባደረገው ጥናት ማረጋገጡን አስታውቋል ።
ከዚህ በተጨማሪ 6መቶ24 ወይንም የአገልግሎቱን 71 በመቶ የመድኃኒት አቅርቦት የሚሸፍኑት የመድኃኒት አይነቶች በአገር ውስጥ የተመዘገበ በቂ አቅራቢ የላቸውም።
በሌላ በኩል 2መቶ53 ወይም 29 ከመቶ የሚሆኑት የመድኃኒት አይነቶች ደግሞ 5 እና ከዛ በላይ የተመዘገበ በቂ አቅራቢ ያላቸው መሆናቸውን አገልግሎቱ አስታውቋል።
ለመድኃኒት አይነቶቹ በቂ አቅራቢ ባለመኖሩ ለፀረ-ካንሰር፣ ለኩላሊት ፣ ለእናቶችና ህፃናት የሚሆኑ መድኃኒቶችን በቀላሉ ለማቅረብ እንደሚቸገር ነው የገለፀው።
አገልግሎቱ ከ3መቶ በላይ የመድኃኒት እና የህክምና መገልገያ ግብአት አቅራቢዎች ጋር ውል በማሰር አገልግሎት እየሰጠ እንደሚገኝም አስታውቋል።
ከእነዚህ መሐል ስምንቱ የአገር ውስጥ የመድኃኒት እና የህክምና መርጃ መሳሪያ አምራቾች ናቸው።
የኢትዮጵያ መድኃኒት አቅራቢ አገልግሎት በቅርንጫፎቹ አማካኝነት ከ3ሺህ በላይ ለሚሆኑ የጤና ተቋማት የቀጥታ የመድኃኒት ስርጭት አገልግሎት ይሰጣል።
እስከዳር ግርማ
ጥቅምት 6 ቀን 2017 ዓ.ም
