በአዲስ አበባ ከተማ ሴቶችና ህፃናት ማህበራዊ ጉዳዮች ቢሮ የሴቶች ተሳትፎ ማብቃትና ተጠቃሚነት ዳይሬክተር ወ/ሮ ስፍራሽ አልባው፤ከ15 ሚሊዮን ብር በላይ ወጪ በማድረግ በከተማዋ ውስጥ በችግር ላይ ወድቀው ለነበሩ ለ1ሺህ 5መቶ77 ሴቶች የስራ እድል መፍጠራቸውን ለጣቢያችን ተናግረዋል።
ወ/ሮ ስፍራሽ ቢሮዉ በዋናነት ሴቶች ከአልችልም ባይነት ወጥተው እራሳቸውን በኢኮኖሚ እንዲደግፉ የአመለካከትና ስብዕና ቀረፃ ላይ እየሰራ ይገኛል ብለዋል፡፡
የስራና ክህሎት ሚኒስቴር ለሴቶች ስራ መፈጠር ሼዶችን በመስጠት ረገድ አብሮን እየሰራ ይገኛል ነዉ ያሉት፡፡
ባለፉት ስድስት ወራት ከ1መቶ25 ሺህ በላይ ለሚሆኑ ሴቶች ስልጠና መስጠታቸውንም ጠቁመዋል።
የሴቶችን ኢኮኖሚያዊ ተጠቃሚነትን ከማረጋገጥ አንፃር ደግሞ 1ሺህ 5መቶ77 ለሚሆኑት እንደየፍላጎታቸው የእንጀራ ፣የዳቦ መጋገሪያ እንዲሁም ሌሎች ማሽኞችን ገዝተው መስጠታቸውን ነግረውናል።
ድጋፉ ከተደረገላቸው ውስጥ 88 በመቶ ባሉበት አከባቢ በስራ ላይ መሰማራታቸውን በተደረገ ክትትል ማረጋገጣቸውን ለኢትዮ ኤፍ ኤም ገልጸዋል ።
ልኡል ወልዴ
የካቲት 24 ቀን 2017 ዓ.ም
