አዋሽ ባንክ ለ4 ጊዜ ከ36 ምርጥ የአፍሪካ ባንኮች ውስጥ በመካተት ከኢትዮጵያ ብቸኛ ምርጥ ባንክ በመባል መመረጡን ባንኩ አስታውቋል።
ግሎባል ፋይናንስ እ.ኤ.አ. በማርች 2025 ለ32ኛ ጊዜ የምርጥ ባንኮችን ምርጫን ይፋ ማድረጉን ተከትሎ አዋሽ ባንክ መመረጡ ይፋ ተደርጓል ።
ከአፍሪካ ምርጥ ባንኮች ተብለው የተመረጡት በቀጠና በመከፋፈል ሲሆን ማለትም ከምሥራቅ አፍሪካ፣ ከደቡብ አፍሪካ፣ ከሰሜን ኣፍሪካ፣ ከማዕከላዊ አፍሪካ፣ከምዕራብ አፍሪካ ባንኮች የተመረጡ ናቸው ተብሏል።
ባንኮቹ የተመረጡት በዋናነት በዓመቱ ውስጥ ባስመዘገቡት የትርፍ እና የጠቅላላ የሃብት ዕድገት መጠን መሆኑ ተነግሯል ።
አዋሽ ባንክ ከ36 ምርጥ የአፍሪካ ባንኮች ውስጥ ሊመረጥ የቻለው በግሎባል ፋይናንስ ሜጋዚን የምርጫ መስፈረቶች መሰረት ባንኩ እ.ኤ.አ. በ2024 ባከናወነው የኦፕሬሽን እና ኦፕሬሽን ነክ ባልሆኑ ሥራዎች መሆኑ ተገልጿል ።
እንዲሁም ቁልፍ በሆኑ የፋይናንስ የዕድገት መለኪያዎች ማለትም በጠቅላላ ሃብት ዕድገትና በሀብት መጠን፣ በአጠቃላይ ዓመታዊ ገቢ ዕድገትና ዓመታዊ ትርፍ፣በብድር አቅርቦት፣ በተከፈለ ካፒታል ዕድገትና በትርፍ ድርሻ ክፍፍል ነውም ተብሏል።
በምርጫው አሸናፊ ለሆኑ ባንኮች የሚሰጠው የዕውቅና ሽልማት አሰጣጥ ሥነሥርዓት የዓለም የገንዘብ ድርጅት (IMF) እና የዓለም ባንክ (WB) በአሜሪካ ዋሽንግተን ዲሲ እ.ኤ.አ. በኦክቶበር 18, 2025 ዓ.ም በሚያደርጉት ዓመታዊ የጋራ ጉባዔ ላይ የሚከናወን መሆኑን እና አዋሽ ባንክም በተጠቀሰው ቀንና ሥፍራ በመገኘት ሽልማቱን በክብር የሚቀበል መሆኑን ባንኩ አሳውቋል።
ሐመረ ፍሬው
መጋቢት 25 ቀን 2017 ዓ.ም
