ወረርሽኙን ለመከላከል የህብረተሰቡ ተሳትፎ ተጠናክሮ መቀጠል እንዳለበት የጤና ሚኒስቴር አሳሰበ

የጤና ሚኒስቴር እና የኢትዮጵያ ህብረተሰብ ጤና ኢንስቲትዩት የማርበርግ ቫይረስ በሽታን በተመለከተ ጋዜጣዊ መግለጫ ሰጥተዋል።

ለማርበርግ ቫይረስ ከፍተኛ ተጋላጭነት ለነበራቸው 16 ሰዎች ከውጭ የመጣ Remsedevir የተባለ ፀረ ህዋስ መከላከያ መድሐኒት እንደተሰጠ የጤና ሚኒስቴር ሚኒስትሯ ዶ/ር መቅደስ ዳባ ተናግረዋል፡፡

ለታማሚዎች የተሻለ ሕክምና ለመስጠት ይቻል ዘንድ ከዚህ በፊት ወረርሽኙ ተከስቶባቸው ከነበሩ ሀገራት ጋር የልምድ ልውውጥ በማድረግና ልምድ በመቅሰም ከዚህ በፊት ተሞክረው ጥሩ ውጤት ያስገኙ መድኃኒቶችንና ክትባቶችን በመለየትና ወደሃገር ውስጥ በማስገባት ለታካሚዎች ተደራሽ እየተደረገ ነው ብለዋል።

የማርበርግ ቫይረስን ለመከላከል በሚደረገው ጥረት የህብረተሰቡ ተሳትፎ ከፍተኛ በመሆኑ ትብብሩ ተጠናክሮ እንዲቀጥል የጠየቁት ዶ/ር መቅደስ በአንዳንድ ሰዎች ዘንድ ከበሽታው ከመጠንቀቅ ይልቅ ከመረጃው የመራቅ ሁኔታ እንደሚስተዋል ገልፀዋል።

ቫይረሱን ለመከላከል ከሚደረጉ ቅድመ ተግባራት አንዱ ምርመራ መሆኑን አንስተው፣ ማርበርግ ቫይረስ ከሌሎች በሽታዎች ጋር ተመሳሳይ የሆኑ ምልክቶች ስላሉት ህብረተሰቡ ለሌሎች ህክምናዎች ወደ ህክምና ማዕከላት ሲመጣ የቫይረሱንም ምርመራ እየተከናወነ መሆኑን አስረድተዋል።

እስካሁን ድረስ 73 የተጠረጠሩ ሰዎች ምርመራ የተደረገላቸው መሆኑንና መግለጫው እስከተሰጠበት ስዓት ድረስ በ11 ሰዎች ላይ ቫይረሱ መገኘቱን ገልፀዋል። ከእነዚህም 6ቱ ታማሚዎች ህይወታቸው በቫይረሱ ያለፈ መሆኑን በኢትዮጵያ ህብረተሰብ ኢንስቲትዩት ሪፈረንስ ላቦራቶሪ እንደተረጋገጠና አምስቱ ደግሞ ህክምና እየተደረገላቸው እንደሚገኝ አስታውቀዋል።

349 ሰዎች ንክኪ ያላቸው በመሆኑ ክትትል እየተደረገላቸው ሲሆን፣ 119ኙ ደግሞ የለይቶ ማቆያ ጊዜያቸውን ማጠናቀቃቸውን ሚኒስትሯ ተናግረዋል።

አዲስዓለም አበበ

ህዳር 17/2018 ዓ.ም

FacebooktwitterredditpinterestlinkedinmailFacebooktwitterredditpinterestlinkedinmail

Leave a Reply

Your email address will not be published. Required fields are marked *