ኢራን ውስጣዊ ክፍፍሏን ለመሸፈን አዲስ የብሔራዊ አንድነት ፕሮፓጋንዳ ዘመቻ ጀምራለች ተባለ

የኢራን መሪዎች በሀገሪቱ ውስጥ የኢኮኖሚ ስቃይ እየተባባሰ ባለበት በዚህ ወቅት፣ ብሔራዊ አንድነትን እና በአለም አቀፍ ልዕለ-ኃያል ላይ የተገኘን ድል የሚያወድሱ አዳዲስ የፕሮፓጋንዳ ፖስተሮችን በቴህራን ጎዳናዎች ላይ በስፋት እየበተኑ ይገኛሉ።

ባለስልጣናቱ ከሀገሪቱ አብዮታዊ ጥበቃዎች እና በተዘጋው የሆርሙዝ ባህረ-ሰላጤ ምስሎች ጎን ለጎን፣ የብሔራዊ መቋቋምን መንፈስ ለመቀስቀስ ሲሉ በወታደራዊ ጭብጥ የተዘጋጁ የጅምላ ሰርግ ሥነ-ሥርዓቶችን እና በምስጊዶች ውስጥ ይፋዊ የጠመንጃ ሥልጠናዎችን እያዘጋጁ ነው።

ከዚህ ቀደም ከነበሩት አብዮታዊ ሃይማኖታዊ መልዕክቶች በተለየ፣ የዛሬው ፕሮፓጋንዳ ጠንካራ ከሆኑት የገዥው አካል ደጋፊዎች ባለፈ ሰፊውን ሕዝብ ለማነቃቃት ያለመ ብሔራዊ ጭብጦችን ያጎላል ።

በአለም አቀፍ የችግሮች ተንታኝ ቡድን (International Crisis Group) የኢራን ፕሮጀክት ዳይሬክተር የሆኑት አሊ ቫኤዝ “የእስላማዊቷ ሪፐብሊክ የቀድሞ ርዕዮተ-ዓለም በማኅበረሰቡ ውስጥ ያን ያህል ተሰሚነት አልነበረውም ስለዚህም ሰፊውን ሕዝብ ማንቀሳቀስ የሚችሉ ሌሎች የኢራን ማንነት አካላትን መጠቀም አስፈላጊ ሆኖ ተገኝቷል” ብለዋል።

ሆኖም ግን፣ ቫኤዝ እና ሌሎች ተንታኞች እንደሚሉት፣ ይህ ዘመቻ እጅግ ተስፋ በቆረጠው ሕዝብ ዘንድ ምን ያህል ስኬት ሊኖረው ይችላል የሚለው አጠራጣሪ ነው።

ኢራን የአሜሪካ እና የእስራኤልን የአየር ጥቃቶች መቋቋም የቻለች ቢሆንም፣ እንዲሁም ወሳኝ የሆነውን የአለም አቀፍ የነዳጅ አቅርቦት መስመር የሆርሙዝ ባህረ-ሰላጤን በመዝጋት የአሜሪካውን ፕሬዝዳንት ዶናልድ ትራምፕን ወደ ድርድር ጠረጴዛ መመለስ ብትችልም፣ በሀገር ውስጥ ግን እጅግ አስከፊ ሁኔታ ውስጥ ትገኛለች ተብሏል።

ከጦርነቱ በፊትም ቢሆን በከፋ ሁኔታ ውስጥ የነበረው ኢኮኖሚ አሁን የመፈራረስ አደጋ ተጋርጦበታል፤ እንዲሁም እየተጠናከረ የመጣው የጭቆና ዘመቻ ባለስልጣናቱ በሀገሪቱ ውስጥ እንደገና አመጽ ሊነሳ ይችላል ብለው እንደሚሰጉ ያሳያል።

በዚህ አስቸጋሪ ሁኔታ ውስጥ ባለስልጣናቱ አሁንም የተለመዱትን የኢራን የብሔራዊ መቋቋም እና የምዕራባውያንን ተንኮለኛነት የሚያሳዩ የፕሮፓጋንዳ ጭብጦችን እየተጠቀሙ ነው፤ ነገር ግን አንዳንድ የቀድሞ አብዮታዊ ምስሎችን ዝቅ እያደረጉ ይገኛሉ።

ይህ በእንዲህ እንዳለ፣ ባለስልጣናቱ በተደጋጋሚ በሚያዘጋጇቸው ሰልፎች ላይ የመንግሥት ቴሌቪዥን ሽፋን የጭንቅላት ሂጃብ ያላደረጉ ሴቶችን ቃለ-መጠይቅ እያሳየ ይገኛል፤ ይህም በኢራን መገናኛ ብዙኃን ውስጥ ለረጅም ጊዜ ሊታይ የማይችል አስገራሚ ክስተት ነው።

በስኮትላንድ በሚገኘው የቅዱስ እንድርያስ ዩኒቨርሲቲ የዘመናዊ ታሪክ ፕሮፌሰር የሆኑት አሊ አንሳሪ “ይህ በኢራን ውስጥ ሁሉም ነገር የተለመደ መሆኑን፣ ሁላችንም አንድ መሆናችንን እና የራሳችንን ሕዝብ እንደማናርድ ለማሳየት የሚደረግ ሙከራ ነው” ካሉ በኋላ “በመሃል ላይ ባሉ እና ውሳኔ ባልሰጡ ሰዎች ዘንድ በተወሰነ ደረጃ ሊሠራ ይችላል፣ ነገር ግን አብዛኛው የኢራን ሕዝብ በእርግጥ አያምነውም” ሲሉ አክለዋል።

ኢራን የሆርሙዝ ባህረ-ሰላጤን በመዝጋት ረገድ ያስመዘገበችው ስኬት በትራምፕ ላይ ያነጣጠሩ የኢንተርኔት ምስሎችን (Memes) በመጠቀም ለውጭ ሀገር የፕሮፓጋንዳ ዘመቻ፣ እንዲሁም በኢራን የውስጥ መልዕክቶች ውስጥ ማዕከላዊ ሚና ተጫውቷል።

በኢራን ውስጥ ያለው ሥልጣን በጦርነቱ ወቅት ከሃይማኖት አባቶች ወደ አብዮታዊ ጥበቃ አዛዦች በከፍተኛ ሁኔታ የተዛወረ ሲሆን፣ ይህም ለዓመታት ሲካሄድ የነበረውን ቀስ በቀስ ሽግግር ማጠናቀቁን የኢራን የፖለቲካ ውስጥ አዋቂዎች ተናግረዋል።

አሊ ቫኤዝ “ገዥው አካል እያወጣቸው ባሉ ትረካዎች ላይ የሚታየው የጉዞ አቅጣጫ፣ በእውነቱ ገዥው አካል እየደረሰበት ያለውን ለውጥ አመላካች ነው። ስርዓቱ ከሃይማኖታዊ ሥርዓት ወደ ወታደራዊ ሥርዓት እየተቀየረ ነው” ብለዋል።

የኢራን ብሔራዊ የእግር ኳስ ቡድን ሰላምታ ሲሰጥ የሚያሳዩ ምስሎች፣ እና አዲሱ ጠቅላይ መሪ ሞጅታባ ኻሜኒ ከትልቅ የኢራን ሰንደቅ ዓላማ ጋር የሚታዩባቸው ምስሎች ይህንን አዲስ የአርበኝነት ጭብጥ ይበልጥ የሚያጠናክሩ ሆነው ቀርበዋል ሲል ሮይተርስ ተዘግቧል ።

ሀና ሰይፉ

ግንቦት 14/2018 ዓ.ም

FacebooktwitterredditpinterestlinkedinmailFacebooktwitterredditpinterestlinkedinmail

Leave a Reply

Your email address will not be published. Required fields are marked *