ለሱዳናዊያን የዳቦ ጥያቄ አዲስ ባይሆንም ሱዳናዊያን ተማሪዎች የዳቦ ጥያቄ ይዘው አደባባይ ወጥተዋል፡፡
በሺህዎች የሚቆጠሩ ሱዳናዊያን ተማሪዎች የዳቦ ጥያቄ ይዘው አደባባይ መውጣታቸው ተነግሯል፡፡
ተማሪዎቹ ከሰሞኑ በሀገሪቱ ከተፈጠረው ግጭት ጋር በተያያዘ የኑሮ ውድነት ጫናውን መቋቋም እንዳልቻሉ በሰላማዊ ሰልፉ ላይ አሰምተዋል።
በቀይ ባህር አካባቢ እና በምስራቁ የሀገሪቱ ክፍል የሚኖሩ ነዋሪዎችም ከኑሮ ውድነት ጋር በተያያዘ ምሬታቸው ማሰማት ከጀመሩ ሰነባብተዋል፡፡
በሁለተኛ ደረጃ ተማሪዎች አማካኝነት የተጀመረው የዳቦ ጥያቄ አሁን ላይ በመላው ሀገሪቱ የሚገኙ ተማሪዎች ተቃውሞአቸውን እያሰሙ ይገኛሉ፡፡
ተማሪዎቹ ባሁኑ ሰአት ዋና ዋና መንገዶችን በመዝጋት ተቃውሞአቸው እያሰሙ ይገኛሉ ሲል ኦል አፍሪካን ዶት ኮም ዘግቧል።
የአካባቢው አስተዳዳሪዎችም ከተማሪ ተወካይ ጋር በጉዳዩ ዙርያ መነጋገራቸው ተሰምቷል፡፡
በሱዳን የዋሊ ግዛት አስተዳዳሪ አብድላህ ሻንጋራይ እንደተናገሩት መንግስት የተማሪዎችን መብት ያከብራል ተማሪዎችም የሀገሪቱን ህግ ማክበር አለባቸው ብለዋል፡፡
አስተዳዳሪው አክለው እንደተናገሩትም በሰላማዊ መንገድ ተማሪዎች ጥያቄያቸውን ማቅረብ ይችላሉ ይህ ደግሞ ሀሳብን በነጻነት የመግለጽ መብታቸው ሊከበርም ይገባል ሲሉ ተናግረዋል፡፡
በሱዳን ዳርፉር ከሰሞኑ ከተቀሰቀሰው ግጭት ጋር ተያይዞ 100 ሺህ የሚጠጉ ሱዳናዊያን ቤታቸው ጥለው ተሰደዋል፡፡
እንደዚሁም 250 የሚሆኑ ዜጎች ደግሞ ከዚሁ ግጭት ጋር በተያያዘ ህይወታቸው አልፋል፡፡
ከፈረንጆቹ 2007 አንስቶ በሱዳን በተለያዩ ጊዜያት በተፈጠሩት ግጭቶች 400 ሺህ ዜጎች ህይወታቸው ሲያልፍ ሶስት ሚሊየን ሱዳናዊን ደግሞ ከቤት ንብረታቸው እንደተፈናቀሉ የመንግስታቱ ድርጅት መረጃ ያሳያል፡፡
በሔኖክ ወ/ገብርኤል
የካቲት 8 ቀን 2013 ዓ.ም
