በዓመት ከ 300 ሺ በላይ ለሚገመቱ ታካሚዎች አገልግሎት የሚሰጠውና ከ 8000 በላይ ቀዶ ህክምናዎችን እንዲሁም ከ 6-7 ሺ የሚገመቱ እናቶችን የሚያዋልደው የአይደር ሪፈራል ሆስፒታል የሚሰጠው በጀት ተቋሙ የሚሰጠውን አገልግሎት እና የስራ ጫና ከግምት ውስጥ ያስገባ እንዳለሆነ የሆሰፒታሉ የፋርማሲ ዳይሬክተር አቶ ጣዕመ አረጋዊ ተናግረዋል፡፡
ሆስፒታሉ ያጋጠመውን የመድኃኒቶች እና የላብራቶሪ ግብዓቶች እጥረት ለመቅረፍ በፋርማሲ ባለሞያዎች ጥናት መሰረት 270 ሚሊየን ብር ያስፈልግ እንደነበር የተገለጸ ሲሆን ነገር ግን የተመደበው በጀት ከ 20 ሚሊዮን ብር እንዳልበለጠ ነግረውናል፡፡
በ2016 በጀት አመት እስከ 300 ሚሊዮን ብር እንደሚያስፈልገው ገልጾ 20 ሚሊዮን ብር ብቻ እንደተመደበላቸው ያስታወሱት ዳይሬክተሩ በዘንድሮ በጀት አመትም የበጀት አመዳደቡ አልተሻሻለም ብለዋል።
ተመሳሳይ አገልግሎት ለሚሰጡ ሆስፒታሎችህ ከአይደር የተሻለ በጀት እንደተመደበላቸው የነገሩን ዳይሬክተሩ የምንሰጠው አገልግሎት ተመሳሳይ ሆነ ሳሉ መለያየቱ እንዳሳዘናቸው ነግረውናል፡፡
ሆስፒታሉ የመድሃኒት ችግሮቹን ለመቅረፍ በኢትዮጵያ የመድሃኒት አቅርቦት ድርጅት እርዳታ በብድር ሲወስድ የቆየ ሲሆን የብድሩ መጠን ከ 50 ሚሊየን ብር በላይ በመሻገሩ ለ 2017 በጀት ዓመት ምንም ዓይነት መድሃኒት በብድር እንደማናገኝ ከመድሃኒት አቅርቦት ድርጅት ተነግሮናል ብለዋል።
ለአለም አሰፋ
ጥቅምት 7 ቀን 2017 ዓ.ም
