ቦርዱ አዲስ የሚመሰረቱ የፖለቲካ ፓርቲዎች ከዚህ በፊት ‹‹የሙሉ ዕዉቅና›› ለማግኘት ሲከፍሉ የነበረዉን 2 መቶ ብር ወደ 30 ሺህ ከፍ ማድረጉን አስታዉቋል፡፡
ከዚህ በተጨማሪ አዲስ የሚመሠረቱ ፓርቲዎች ጊዜያዊ እውቅናን ለማግኘት ይከፍሉ የነበረውን 1መቶ ብር ወደ 15 ሺህ ብር ከፍ አድርጎታል፡፡
በአዲሱ የምርጫ ቦርድ የዋጋ ማሻሻያ አዲስ የሚቋቋሙ የፖለቲካ ፓርቲዎች ጊዜያዊ እና ሙሉ የዕውቅና ምስክር ወረቀቶችን ለማግኘት በድምሩ 45 ሺህ ብር መክፈል እንደሚጠበቅባቸዉ ነዉ የተገለጸዉ፡፡
ከትናንት ሰኞ ጥቅምት 11 ጀምሮ ተግባራዊ የሆነው ይህ የዋጋ ማሻሻያ ቦርዱ ለፖለቲካ ፓርቲዎች በሚሰጣቸው ሦስት አገልግሎቶች ላይ ነው።
በዚህም ሌላኛዉ ጭማሪ የተደረገበት አገልግሎት ደግሞ የተመዘገቡ ፖለቲካ ፓርቲዎች መሰረታዊ ሰነዶቻቸዉን በጉባዔ አሻሽለዉ ሲያቀርቡ ይከፍሉት የነበረዉ ክፍያ ነዉ፡፡
ይህን አገልግሎት ለማግኘት 30 ብር ይከፍሉ የነበሩ የተመዘገቡ ፓርቲዎች አሁን ላይ አገልግሎቱን ለማግኘት 5ሺህ ብር መክፈል እንደሚጠበቅባቸዉ ቦርዱ አስታዉቋል፡፡
የፖለቲካ ፓርቲዎችን የመመዝገብ እንዲሁም የመከታተል እና የመቆጣጠር ኃላፊነት በአዋጅ የተሰጠው የኢትዮጵያ ብሔራዊ ምርጫ ቦርድ፤ ለሚሰጣቸው አገልግሎቶች የሚጠይቀው ክፍያ ተመን ላይ ጭማሪ ማድረጉን ያስታወቀው ዛሬ ማክሰኞ መስከረም 12/2017 ዓ.ም. ነው።
እስከዳር ግርማ
ጥቅምት 12 ቀን 2017 ዓ.ም
