ሙሉ ለሙሉ ክትባት ካልወሰዱት ህጻናት በተጨማሪ ክትባቱን ጀምረዉ ያቋረጡ መኖራቸዉንም ሰምተናል፡፡
በጤና ሚኒስቴር የክትባት ፕሮግራም ሀላፊ የሆኑት አቶ መስፍን ካሴ፤ ባለፈዉ ዓመት ክትባት ካልወሰዱት ከአንድ ሚሊየን በላይ ህጻናት በተጨማሪ ክትባቱን ጀምረዉ ያቋረጡ እንዳሉ ጥናቶች ያሳያሉ ብለዋል።
ይህንን ለማስተካከል ክትባት የመስጠቱ ስራ እየተሰራ ይገኛል ያሉት አቶ መስፍን፤ 65 በመቶ የሚሆነዉ የክትባት ፕሮግራም በጤና ጣቢያና በሆስፒታሎች እየተሰጠ መሆኑን ገልጸዋል፡፡
ከህክምና ቦታዎች ርቀዉ ለሚገኙ ደግሞ የጤና ባለሙያዎች ያሉበት ድረስ በመሄድ ክትባቱን እየሰጡ እንደሚገኙም ተናግረዋል፡፡
ክትባት ያላገኙትን ህፃናት ክትባት እንዲያገኙ በዘመቻ መልክ እየሰራን እንገኛለን ያሉት ሃላፊዉ፤ ዜሮ ዶዝ ከሚባለዉ ክትባት ወደ 16 በመቶ የሚሆነዉን ተደራሽ ሆኗል ብለዋል።
ማህበረሰቡን ስለ ክትባት ጥቅም በማሳወቅ የህጻናትን ሞት ለመቀነስ የተለያዩ ስራዎች ከሃይማኖት አባቶች እና ከጤና ባለሙያዎች ጋር እየተሰራ መሆኑንም ተናግረዋል፡፡
ሊዲያ ደሳለኝ
ጥቅምት 13 ቀን 2017 ዓ.ም
