በትግራይ ክልል ሽረ ከተማ ከዞን እና ወረዳዎች የመጡ የተለያዩ ተፈናቃዮች መኖራቸዉ ሲገለጽ ፤ ተገቢዉ ምዝገባ ባለመደረጉ የመድሃኒት አቅርቦት ችግር እንደሆነ ተገልጿል፡፡
በኢትዮጵያ መድሃኒት አቅራቢ አገልግሎት ሽረ ቅርንጫፍ ዋና ስራ አስኪያጅ አቶ ሙሌ አብርሃ ፤ከጣቢያችን ጋር በነበራቸዉ ቆይታ፤በከተማዋ ከምዕራብ ትግራይ የመጡ የአንድ ዞን ነዋሪዎች ተፈናቅለዉ እንደሚገኙ ነግረዉናል፡፡
በተለያዩ ከተማዎችም በኤርትራ በኩል ያልተመለሱ እንዲሁም ተጨማሪ ሌሎች ከሶስት ወረዳዎች የተፈናቀሉ ነዋሪዎች መኖራቸዉንም አንስተዋል፡፡
ይህ የተፈናቃይ ቁጥር ከሌሎች መደበኛ ነዋሪዎች ጋር ያልተመዘገበ በመሆኑ መድሃኒት አቅርቦት ላይ ችግር ፈጥሮብናል ብለዉናል፡፡
ለተመዘገበ ነዋሪ የሚላከዉ የመድሃኒት ኮታ ቢኖርም ያልተመዘገቡ ተፈናቃዮች በመኖራቸዉ ግን መድሃኒቱን በበቂ ሁኔታ ማከፋፈል አልተቻለም ነዉ ያሉት፡፡
የአገር ዉስጥ ተፈናቃዮች ጉዳይ አሁንም ችግር ሆኖ ቀጥሏል የሚሉት ስራ አስኪያጁ፤ በተቻለን መጠን በመነጋገር ችግሩን ለመፍታት እየሞከርን እንገኛለን ብለዋል፡፡
ችግሩ በመንግስት ባይፈታም እኛ ተግባብተን ለመፍታት እየሞከርን ነዉ ያሉት አቶ ሙሌ፤ ወረዳዎች መድሀኒት ሲጠይቁ ተፈናቃዮችንም ከቁጥር አስገብተዉ እንዲጠይቁ የማድረግ ስራ እየተሰራ እንደሚገኝ ገልጸዋል፡፡
ይህ ችግር የአገልግሎቱም ሆነ የቅርንጫፍ ጽ/ቤቶቹ ሳይሆን የአገሪቱ ችግር ይመስለኛል ያሉት ስራ አስኪያጁ ፤ ከመንግስት መፍትሄ ባይገኝም ከወረዳዎቹ ጋር ግን በመተባበር ለመፍታት እየሞከርን ነዉ ብለዋል፡፡
እስከዳር ግርማ
ጥቅምት 19 ቀን 2017 ዓ.ም
