በሀገሪቱ ያሉትን አንበሶች ከመጥፋት መታደግ ይገባል ተባለ።

በኢትዮጵያ የዱር እንስሳት ጥበቃ ባለስልጣን የአንበሳ እና የስጋ በል እንስሳት ተመራማሪ የሆኑት አቶ ካህሳይ ገብረ-ትንሳይ አሁን ላይ በኢትዮጵያ ያሉት አንበሶች ቁጥር ከ9መቶ እስከ 1 ሺ ካለው ቁጥር አይበልጡም ሲሉ ለኢትዮ ኤፍኤም ተናግረዋል።

በሃገሪቱ አሁን ላይ አንበሶች ያሉበት ሁኔታ ለማወቅ ጥናት ማድረጋቸውን የገለፁልን ተመራማሪው በአዋሽ እና በመካከለኛው አዋሽ በተደረገው ጥናት መሰረት ያለው ሁኔታ ተስፋ ሰጪ ቢሆንም አሁንም ግን ሁሉም ርብርብ ካላደረገ አንበሶቹን ልናጣ እንችላለን ብለዋል፡፡

ተመራማሪው እንደሚሉትም ህገወጥ የነዋሪዎች ሰፈራ፣ የደን ጭፍጨፋ መኖር፣ የእርሻ ስራ እና ግጦሽ መበራከት አንበሶቹ የሚፈልጉትን ምግብ እንዳያገኙና በምግብ ሰንሰለት ውስጥ ችግር እንዲፈጠር ብሎም ለህገወጥ አደን በስፋት ተጋላጭ እንዲሆኑ አድርጓቸዋል ብለዋል።

ከቅርብ ጊዜያት ወዲህ የባህል መድኃኒት ቀማሚዎች ፊታቸውን ወደ አንበሳ አጥንት ማዞራቸው እንስሳቶቹን ለህገወጥ አደን ይበልጥ ተጋላጭ እንዲሆኑና ቁጥራቸው እንዲመናመን ማድረጉን በባለስልጣኑ ተመራማሪው ይናገራሉ።

ቀጣይነት ያለው ጥናት በመላ ሃገሪቱ ለማድረግ ማቀዳቸውን የገለጹልን ተመራማሪው የሁሉም ባለድርሻ አካላትን ርብርብንም ጠይቀዋል፡፡

ከኢትዮጵያ ማህበረሰብ ጋር በባህልም ይሁን በሌላ ሰፊ ቁርኝት እንዳለው የሚነገረው አንበሳ ከመንገስትም ይሁን ከማህበረሰቡ ከፍተኛ ትኩረት ካልተደረገለት የአንበሳ ስሙ ብቻ ሊቀር እንደሚችል እና አንበሳ የሚባል ነገር ታሪክ ሊሆን ይችላል ሲሉ ስጋታቸውን ለጣቢችን አሳስበዋል፡፡

ለአለም አሰፋ

ታኅሣሥ 1ቀን 2017 ዓ.ም

FacebooktwitterredditpinterestlinkedinmailFacebooktwitterredditpinterestlinkedinmail

Leave a Reply

Your email address will not be published. Required fields are marked *