የሥራና ክህሎት ሚኒስቴር በሚያመቻቸው የውጭ ሀገር ሥራ ስምሪት እድል ለመጠቀም በተለያዩ የሙያ መስኮች የተለያዩ ስልጠናዎችን የወሰዱ ዜጎች በተቋሙ ላይ ተደጋጋሚ ቅሬታን ለ ኢትዮ ኤፍኤም አቅርበዋል፡፡
ቅሬታ አቅራቢ ዜጎች፤ ሚኒስቴር መስሪያ ቤቱ ወደ ውጪ ሀገራት ለመላክ በሚያመቻቸው የስራ ስምሪት ተጠቃሚ ለመሆን በተለያዩ ዘርፎች ስልጠና ብንወስድም ቃል የተገባልን ሊፈጸም እና ሊልከን አልቻለም ሲሉ ቅሬታ ነግረውናል፡፡
በሚኒስቴር መስሪያ ቤቱ የስራ ገበያ መረጃ ስርዓት ሀላፊ አቶ ብርሀኑ አለቃ በጉዳዩ ላይ ለጣቢያችን ምላሽ እንዲሰጡበት ያደረግን ሲሆን በተለይ በሹፍርና የሙያ ብቃት ሰልጥነው እና ህጋዊ ማረጋጋጫ ይዘው ወደ ውጪ ሀገራት ለመሄድ ሚጠባበቁ 1 ሺ ዜጎችን እስካሁን ለመካል ችለናል ብለዋል፡፡
ነገር ግን በሹፍርናም ሆነ በተለያዩ የስልጠና ዘርፎች አሁንም ቢሆን ዜጎችን ያለ ገደብ በተፈለገው ፍጥረት ለመላክ ክፍተቶች ማጋጠማቸውን ነግረውናል፡፡
ተቋሙ በሚያመቻቸው በዚህ እድል ተጠቃሚ የሚሆኑ ዜጎችን የሚልኩ ኤጂንሲዎች ጋር ተነጋግረን ችግሩን ለመፍታት እየሰራን ነው ያሉት አቶ ብርሀኑ ህገወጥ ኤጀንሲዎች ላይ ህጋዊ እርምጃ የመውሰድ ሂደት ስለመኖሩም ነግረውናል፡፡
ስልጠና አጠናቀው ወደ ውጪ ሀገራት ለመሄድ የሚጠባበቁ ዜጎችም ተቋሙ እስከ አንድ ወር ጊዜ ውስጥ ምላሽ እንደሚኖረው አስታውቀዋል፡፡
የስራ እና ክህሎት ሚኒስቴር ባለፉት ሰባት ወራት ከ 2 መቶ 30 ሺ በላይ ዜጎች ወደ ውጪ ሀገራት ሄደዋል ሲል አስታውቆናል፡
የውልሰው ገዝሙ
የካቲት 21 ቀን 2017 ዓ.ም
