ኳታር ላይ ጥቃት እንዲፈጸም ያዘዙት ኔታኒያሁ ናቸዉ አሜሪካ ጣልቃ ለመግባት ጊዜ አልነበራትም ሲሉ ትራምፕ ገለጹ

የአሜሪካው ፕሬዝዳንት ዶናልድ ትራምፕ እስራኤል ኳታርን እንድታጠቃ የተደረገው ውሳኔ ሙሉ በሙሉ በእስራኤል ጠቅላይ ሚኒስትር ቤንያሚን ኔታንያሁ የተሰጠ ነው ሲሉ አስተዳደራቸው ጥቃቱን ለመከላከል በቂ ጊዜ እንዳልነበረዉ አጽንኦት ሰጥተዋል።

ትራምፕ በትሩዝ ሶሻል አካውንታቸው ላይ ባወጡት መግለጫ፤ በእስራኤል ኳታር በሚገኝ የሃማስ ተደራዳሪዎች ልዑክ ላይ የተፈጸመውን ጥቃት አዉግዘዋል፡፡

እሳቸውም ኳታር ሉዓላዊት ሀገር እና የአሜሪካ የቅርብ ወዳጅ ስትሆን ከእኛ ጋር ሰላም ለመፍጠር በትጋት እና በድፍረት እየሰራች ባለችበት ወቅት ያለ ማስጠንቀቂያ ቦምብ መጣል ለእስራኤልም ሆነ ለአሜሪካ ዓላማ አይጠቅምም ብለዋል።

ትራምፕ አክለውም ይህ ውሳኔ የተደረሰዉ በጠቅላይ ሚኒስትር ኔታንያሁ እንጂ በእኔ የተደረገ ውሳኔ አይደለም ብለዋል፡፡

አስተዳደራቸው ጥቃቱ ከመፈጸሙ ጥቂት ቀደም ብሎ በአሜሪካ ጦር በኩል እንደደረሳቸዉ የጠቆሙት ትራምፕ፤ ልዩ መልዕክተኛቸውን ስቲቭ ዊትኮፍን የሚመጣውን ጥቃት ለኳታሮች እንዲያሳውቁ እንዳዘዙ ገልፀዉ በሚያሳዝን ሁኔታ ለማስቆም በጣም ዘግይቶ ነበር ሲሉ ተናግረዋል፡፡

የኳታር የውጭ ጉዳይ ሚኒስቴር ቃል አቀባይ መንግሥት ስለ ጥቃቱ አስቀድሞ መረጃ ነበረው የሚለው አባባል ፍጹም ውሸት ነው ብለዋል።

ከአንድ የአሜሪካ ባለሥልጣን የተቀበልነዉ ጥሪ የመጣው በእስራኤል ጥቃት በዶሃ ከተከሰቱት ፍንዳታዎች ድምፅ በኋላ ነው ሲሉ ገልጸዋል፡፡

የኳታር የውጭ ጉዳይ ሚኒስትር ሼክ መሐመድ ቢን አብዱልራህማን አል ታኒ እንደተናገሩት፤ ከዩናይትድ ስቴትስ የተደረገው ጥሪ ጥቃቱ ከጀመረ ከአሥር ደቂቃ በኋላ የመጣ ሲሆን፤ ክስተቱንም የመንግሥት ሽብርተኝነት ነዉ ሲሉ ገልጸውታል።

ትራምፕ በኋላም ስለ ጥቃቱ በጣም አዝኛለሁ ብለው እንደተናገሩ እና ዳግም እንደማይከሰት ለኳታር ማረጋገጫ እንደሰጡ ተናግረዋል ሲል የዘገበዉ አልጀዚራ ነዉ።

እስከዳር ግርማ

ጳጉሜ 5/2017 ዓ.ም

FacebooktwitterredditpinterestlinkedinmailFacebooktwitterredditpinterestlinkedinmail

Leave a Reply

Your email address will not be published. Required fields are marked *