ጠቅላይ ሚኒስትሩ በኦሮሚያ፣ በአማራና በትግራይ ክልሎች በተከሰቱት የጸጥታ መታወኮች ዙሪያ ማብራሪያ ሰጡ
በዛሬው በሕዝብ ተወካዮች ምክር ቤት አዳራሽ በተካሄደው 30ኛ መደበኛ ስብሰባ ላይ የተገኙት ጠቅላይ ሚኒስትር ዐቢይ አሕመድ (ዶ/ር)፣ ካለፉት ፈተናዎችና ከቀጣይ የሀገሪቱ የብልጽግና ጉዞ ጋር በተያያዘ ከምክር ቤቱ አባላት ለቀረቡላቸው ጥያቄዎች ምላሽ ሰጥተዋል።
ጠቅላይ ሚኒስትሩ በሰጡት ማብራሪያ፣ በተለያዩ የሀገሪቱ ክፍሎች የተደቀኑትን የጸጥታ ስጋቶች፣ የሰላም እጥረትና የዜጎችን እንግልት በዝርዝር ዳስሰዋል።
በተለይም በኦሮሚያና በአማራ ክልሎች የሚስተዋሉትን የዕገታና የሽብር ተግባራት እንዲሁም በትግራይ ክልል ከህወሃት (TPLF) መዋቅርና ከሰላም ስምምነቱ ትግበራ ጋር ተያይዞ የሚነሱትን የጸጥታ ማጠናከሪያ ጥያቄዎችን አስመልክቶ ማብራሪያ ተሰጥቷል።
ምክር ቤቱ በመዲናዋና በተለያዩ ክልሎች ከተሞች የሚስተዋሉትን ሕገ-ወጥ “አፈሳዎች” (የጅምላ እስራቶች) እና ዜጎችን ለገንዘብ መጠየቂያ የመያዝ አስከፊ ወንጀሎች ላይ ያተኮሩ ጥያቄዎችን ለጠቅላይ ሚኒስትሩ ሰንዝሯል።
ጠቅላይ ሚኒስትር ዐቢይ በንግግራቸው፣ እነዚህ በተለያዩ አካባቢዎች የሚታዩ የሰላም መታወኮችና የዕገታ ወንጀሎች ተራ ክስተቶች አለመሆናቸውን በጥብቅ አሳስበዋል።
እነዚህ ቀውሶች “የማይታይ የውስጥ ቁስል” እየፈጠሩ መሆናቸውን የገለጹት ጠቅላይ ሚኒስትሩ፣ ቁስሉ በቀላሉ የማይታይ ቢሆንም በተግባር ግን “በቀላሉ የማይሽር የውስጥ ቁስል” እየሆነ ሀገሪቱንና ማህበረሰቡን በእጅጉ እየበሉ መሆኑን በምሬት አምነዋል።
ይህ ዓይነቱ የአፈሳ፣ የዕገታ እና የሽብር ተግባር በማህበረሰቡ ስነ-ልቦና ላይ የሚጥለው ጠባሳ ለረጅም ጊዜ የሚዘልቅ መሆኑንም አመላክተዋል።
ባለፉት ዓመታት “ኢትዮጵያ ልትፈርስና ልትወድቅ ነው” በሚሉ ትረካዎች ውስጥ ሀገሪቱ በርካታ የውስጥ ፈተናዎችን እንዳሳለፈች የጠቀሱት ጠቅላይ ሚኒስትሩ፣ አሁንም ቢሆን መንግሥት በትግራይም ሆነ በሌሎች ክልሎች ይሄንን በቀላሉ የማይሽር የውስጥ ቁስል የሚያክም መዋቅራዊ መፍትሔ ለማምጣትና የዜጎችን ደህንነት በአስተማማኝ ሁኔታ ለማስከበር በቁርጠኝነት እንደሚሠራ ገልጸዋል።
በመሆኑም በሀገሪቱ የተደቀነውን ይሄንን አደገኛ የውስጥ ቁስል፣ የአፈሳና የዕገታ ቀውስ በዘላቂነት ለመግታት የመንግሥትና የተቃዋሚ የፓርላማ አባላት (የዶክተር ደሳለኝ ጫኔን የሃሳብ መቀራረብ ጨምሮ) በአንድነት ሊቆሙ እንደሚገባ አሳስበዋል።
ልዑል ወልዴ
ሰኔ 30/2018 ዓ.ም
