አዲስ አበባ ከተማን ጨምሮ በክልል ዋና ዋና ከተሞች በጎዳና የሚኖሩ ዜጎችን ለማንሳት እና ለማቋቋም ጥረቶች ቢኖሩም በድጋሚ ወደ ጎዳና የሚወጡ እንዳሉ ተነግሯል።
በመላ ሀገሪቱ በሚገኙ 21 ከተሞች ዜጎችን ከጎዳና ለማንሳት የሚያግዘው ፕሮጀክት ተግባራዊ እየተደረገ እንደሆነ ሰምተናል፡፡
በሴቶች እና ማህበራዊ ጉዳይ ሚኒስትር በማህበራዊ ዘርፍ የልዩ ድጋፍ አገልግሎት የኘሮጀክቱ አማካሪ አቶ ገመቹ ተርፋሳ ለኢትዮ ኤፍኤም እንደገለፁት እነዚህ ዜጎች ከ3 እስከ 6 ወር በአገልግሎት ማእከሉ ያላቸውን ቆይታ ሲያጠናቅቁ ለቀጣይ ህይወታቸው የሚደረጉ ድጋፎች ቢኖሩም በተለያዩ ምክንያቶች በድጋሚ ወደ ጎዳና ላይ እንደሚመለሱ አቶ ገመቹ ይገልፃሉ።
ከማእከሉ ቆይታ በኋላ ከ20 እስከ 30 ሺህ ብር የስራ ማስጀመሪያ ድጋፎች እንደሚመደቡላቸው አንስተዋል፡፡
ሆኖም በአንዳንድ ከተሞች በሚሰማሩባቸዉ የስራ መስኮች የመስሪያ ቦታዎችን አለማግኘት አንዱ ችግር ነዉ ያሉት አማካሪዉ ከከተማ አስተዳደር ጋር በመነጋገር ጥቂቶች ቦታ እንዲያገኙ ቢደረግም አብዛኞቹ የተረጋጋ ቦታ ማግኘት እንዳልቻሉ ተናግረዋል፡፡
በአለም ባንክ እና በከተማ ልማት ሴፍቲኔት ትብብር ዜጎችን ከጎዳና ላይ ለማንሳት እየተተገበረ ባለው ፕሮጀክት በሁለተኛዉ ዙር ትግበራ 14 ሺህ ያህል የጎዳና ተዳዳሪዎችን ለማንሳት እቅድ ይዟል ተብሏል።
ኘሮጀክቱ ያቅፋቸዋል ተብለዉ የተለዩት በጎዳና ላይ ያሉ እናቶች ÷ ህፃናት ÷ ወጣቶች እና አረጋውያንን ናቸው፡፡
ፕሮጀክቱ 50 በመቶ የሚሆነዉ ሽፋን በ አዲስ አበባ ከተማ የሚሸፍን ይሆናል፡፡
ቁምነገር አየለ
ጥቅምት 20 ቀን 2017 ዓ.ም
