ኢራን ባስወነጨፈቻቸው ሚሳኤሎች በደቡባዊ እስራኤል ባርሺባ ከተማ የሚገኘውና በእስራኤል ትልቁ ከሚባሉት አንዱ ሶሮካ ሆስፒታል መመታቱን እስራኤል አስታወቀች።
ሆስፒታሉ በቀጥታ በሚሳኤል መመታቱን የገለጸችው እስራኤል በዚህም ጥቃት 30 ሰዎች ተጎድተዋል ብላለች።
ኢራን ባስወነጨፈቻቸው ሚሳኤሎች በተጨማሪም ሶስት የሲቪል ስፍራዎች መመታታቸውን አንድ የእስራኤል ወታደራዊ ባለስልጣን ገልጸዋል።
በስፍራው በርካታ ሚሳኤሎች መወንጨፋቸውን እና በቴልአቪቭ እና እየሩሳሌም ፍንዳታ መሰማቱ ተገልጿል።
የሆስፒታሉ ቃል አቀባይ “ሆስፒታሉ ከፍተኛ ጉዳት ደርሶበታል” ብለዋል። በአካባቢው “አደገኛ ንጥረ ነገሮች ሊፈስ” ይችላል በሚል ስጋት ነዋሪዎች ከአካባቢው እንዲርቁ እየተጠየቁ ይገኛል።
የእስራኤል የድንገተኛ አደጋ አገልግሎት ማጌን ዴቪድ አዶም እንዳለው ኢራን በፈጸመችው ጥቃት ቢያንስ 32 ሰዎች መጎዳታቸውን ገልጿል።
የኢራን የዜና ወኪል ኢርና በሆስፒታሉ አቅራቢያ የሚገኘው የእስራኤል ወታደራዊ ማዘዣ እና የስለላ ጣቢያ የዛሬ ጥዋት የሚሳኤል ጥቃት ዋና ኢላማ ነበር ብሏል።
ሰኔ 12 ቀን 2017 ዓ.ም
