የእስራኤል ጠቅላይ ሚኒስትር ቤንያሚን ኔታንያሁ በረዳቶቻቸው እና በኳታር አለ የተባለውን ግንኙነት አስመልክቶ ፖሊስ የጀመረውን ምርመራ አወገዙ።
ረዳቶቻቸውን አስመልክቶ ለፖሊስ ምስክርነታቸውን የሰጡት ጠቅላይ ሚኒስትር ኔታንያሁ ውሃ የማይቋጥር ሲሉ አጣጥለውታል።
የኔታንያሁ አማካሪያቸው እና የቀድሞ ቃለ አቀባያቸው ሰኞ ዕለት በቁጥጥር ስር የዋሉት “የባህረ ሰላጤዋን አገር ገጽታ ለመገንባት ገንዘብ ተቀብለዋል” በሚል የተከፈተባቸው ምርመራ ጋር ተያይዞ ነው።
ሁለቱም ባለስልጣናት ምንም አይነት ጥፋት አልፈጸምንም ሲሉ አስተባብለዋል።
ፖሊስ ስማቸውን ይፋ ያላደረጋቸውን ረዳቶቻቸውን እስር “እገታ” ሲሉ የጠሩት ኔታንያሁ አክለውም “ምንም አይነት ኬዝ የለም” ብለዋል።
በሐማስ እና በእስራኤል መካከል በተደረሰው የጋዛ ተኩስ አቁም ስምምነት ቁልፍ አሸማጋይ የሆነችው ኳታር በበኩሏ በባለስልጣኗ “የስም ማጥፋት ዘመቻ” ስትል አጣጥላዋለች።
ኔታንያሁ በእስራኤል እየተከተሏቸው ባሏቸው ፖሊሲዎች ምክንያት የተነሳባቸው ተቃውሞዎች እየተቀጣጠሉ ባለበት ወቅት ነው ይህ የተሰማው ሲል ቢቢሲ ዘግቧል።
መጋቢት 24 ቀን 2017 ዓ.ም
