በሃይል ማስተላለፊያ መስመሮች እርጅና ምክንያት በተለያዩ ከተሞች እያጋጠመ ያለዉን የሃይል መቆራረጥ ለማስተካከል እየተሰሩ ያሉ ስራዎች 96 በመቶ ደርሰዋል ተባለ፡፡

የኢትዮጵያ ኤሌክትሪክ አገልግሎት የስድስት ከተሞች የኃይል ማሰራጫ መስመር የመልሶ ግንባታ እና አቅም ማሳደግ ፕሮጀክት አጠቃላይ አፈፃፀም 96 በመቶ ደርሷል ብሏል፡፡

በመልሶ ግንባታ ፕሮጀክቱ የተካተቱት ስድስቱ ከተሞች በምዕራፍ አንድ ወላይታ ሶዶ እና ሐረር፣ በምዕራፍ ሁለት ሻሸመኔ እና ደብረማርቆስ፣ በምዕራፍ ሶስት ጎንደር እና ኮምቦልቻ ናቸው፡፡

በእነዚህ ከተሞች በእርጅና ምክንያት በኤሌክትሪክ ኃይል ማሰራጫ መስመሮች እያጋጠመ ያለውን የኃይል መቆራረጥና መዋዠቅ ችግር ለመቅረፍ እየተሰራ ነዉ ተብሏል፡፡

የፕሮጀክቱ ዋና አላማ በእነዚህ ከተሞች ያለውን የመካከለኛ እና ዝቅተኛ የኃይል ማሰራጫ መስመሮች አቅም በማሳደግ፤ በከተሞቹና በዙሪያቸው ያለውን የኃይል አቅርቦት አስተማማኝ ለማድረግ መሆኑም ተገልጿል፡፡

በቀጣይ አዲስ ኃይል የሚጠይቁ ደንበኞችን ለማስተናገድም እንዲያስችል ነው ተብሏል፡፡

በፕሮጀክቱ እስከ አሁን በተከናወነ ስራ 6መቶ4.8 ኪ.ሜ የመካከለኛ መስመር፣4መቶ1.51 ኪ.ሜ የዝቅተኛ መስመር ዝርጋታ ተካሂዷል፡፡

በተጨማሪም 1መቶ23 ነባር የዲስትሪብዩሽን ትራንስፎርመር ማሻሻያ ስራ፣ 1መቶ34 አዳዲስ የዲስትሪብዩሽን ትራንስፎርመሮች ተከላና 28 ሺህ 2መቶ23 የኮንክሪት ምሰሶ ተከላ ስራዎች መከናወናቸዉም ነዉ የተገለጸዉ፡፡

በሻሸመኔ፣ ወላይታ ሶዶ እና ሀረር ከተሞች የኮሚሽኒንግ ስራ ተጠናቆ ርክክብ እየተከናወነ መሆኑም ተገልጿል፡፡

ፕሮጀክቱ በሁለት የቻይና እና በአንድ የህንድ ኩባንያዎች አማካኝነት እየተከናወነ ሲሆን፤ አጠቃላይ የፕሮጀክቱ ግንባታም በዚህ በጀት ዓመት ተጠናቆ ለአገልግሎት እንደሚበቃ ይጠበቃል ተብሏል፡፡

እስከዳር ግርማ

ታኀሣሥ 21 ቀን 2017 ዓ.ም

FacebooktwitterredditpinterestlinkedinmailFacebooktwitterredditpinterestlinkedinmail

Leave a Reply

Your email address will not be published. Required fields are marked *