ሙዚቀኞች ስራዎቻቸውን ገብተው በዚህ ዌብሳት ላይ ማስመዝገብ ይችላሉ ተብሏል።
በሙዚቀኛው ኤሊያስ መልካ ስም የተሰየመው ይህ ዌብ ሳይት(EMCCMO.COM)ባለቤትነታቸው የተረጋገጡ የድምጻውያን ስራዎችን ይመዘግባል ተብሏል።
ዌብሳይቱ የሙዚቀኞችን ስራዎች መመዝገብ ብቻም ሳይሆን በየሚዲያው በ24 ሰዓት ውስጥ ምን ያህል ሙዚቃ እንደተላለፈ የሚመዘግብበትን ወይንም የሚቆጥርበትን ሲስተም አካቷል ተብሏል።
ይህም መገናኛ ብዙሀን በሚያጫውቷቸው ሙዚቃዎች ለሚከፍሉት የሮያሊቲ ክፍያ መረጃን የሚሰጥ ይሆናል።
የኢትዮጲያ አእምሮአዊ ንብረት ባለስልጣን መገናኛ ብዙሀን በሚያጫውቷቸው ሙዚቃዎች የሮያሊቲ ክፍያ አሰባሰብ ላይ ውሳኔ ለመወሰን በዛሬው እለት እየመከረ ይገኛል።
የኢትዮጵያ የቅጅና ተዛማጅ መብቶች የጋራ አስተዳደር እና የኢትዮጵያ የሙዚቃ ቅጅና ተዛማጅ መብቶች የጋራ አስተዳደር በጋራ ባዘጋጁት ሰነድ ዙሪያም ውይይት እየተደረገ ይገኛል።
የሙዚቃ፡ የከዋኞች የድምጽ ሪክርዲንግ እና የኦዲዮቪዢዋል ሥራዎች የሮያልቲ አሰባሰብ እና አከፋፈል ቀመር ላይ መገናኛ ብዙሀን መክፈል ስለሚኖርባቸው ክፍያ ለመወሰን ነው ይህ ውይይት እየተካሄደ ያለው።
የውልሰው ገዝሙ
መጋቢት 23 ቀን 2017 ዓ.ም
