በአሌፖ ከተማና በአካባቢዋ ለቀናት ሲካሄድ የነበረውንና የብዙዎችን ህይወት የቀጠፈውን ግጭት ለማቆም የሶሪያ መንግስት ጦር እና በኩርድ የሚመራው የሶሪያ ዴሞክራሲያዊ ሃይሎች ኤስዲኤፍ ስምምነት ላይ መድረሳቸው ተገልጿል፡፡
በመላው ሶሪያ ከፍተኛ የፀጥታ ስጋት በነገሰበት በዚህ ወቅት ይህ የስምምነት ዜና ለአሌፖ ነዋሪዎች መጠነኛ እፎይታን ይዞ መጥቷል፡፡
ከሶሪያ የተገኘው መረጃ እንደሚያመለክተው የሶሪያ መንግስት ወታደሮች እና የኩርድ ተዋጊዎች በመካከላቸው የነበረውን የጦርነት ግንባር ለመዝጋትና የሃይል አሰላለፋቸውን ወደ ሌሎች ወሳኝ ግንባሮች ለማዞር ተስማምተዋል፡፡
ይህ ስምምነት የመጣው እንደ ሀያት ታህሪር አል ሻም ያሉ የታጠቁ አማፂያን ቡድኖች በአሌፖ ላይ የሚያደርጉትን ግስጋሴ ለመግታት በሚደረገው ጥረት ውስጥ ነው፡፡
የሁለቱ ወገኖች ተወካዮች እንደገለጹት ከሆነ አሁን የተደረሰው ስምምነት በዋናነት ሰላማዊ ሰዎች ካሉበት ቀውስ እንዲወጡና አስፈላጊው የሰብዓዊ እርዳታ እንዲቀርብ መንገድ የሚከፍት ነው፡፡
ይህም የንግድ እንቅስቃሴዎች እንዲቀጥሉና የህክምና ተደራሽነት እንዲሻሻል እድል ይሰጣል ተብሎ ይታመናል፡፡
ከዚህም ባሻገር ይህ እርቅ በከተማዋ ሰሜናዊ ክፍል ያሉ ስትራቴጂካዊ ቦታዎች በአማፂያን እጅ እንዳይወድቁ በጋራ ለመከላከል የሚያስችል ወታደራዊ ቅንጅትንም ያካትታል፡፡
የስምምነቱ ዘላቂነት አሁንም በብዙዎች ዘንድ ጥርጣሬ ላይ የወደቀ ቢሆንም ለጊዜው ግን የተኩስ ድምፅ መቆሙ ትልቅ ድል ተደርጎ ተወስዷል፡፡
ሱፊያን አህመድ
ታህሳስ 14/2018 ዓ.ም
