ገዳሙ ያለበትን ችግር ለመቋቋም ከመጋቢት 25 እስከ ሚያዝያ 2017 ዓ.ም ወደ ገዳሙ የበረከት ጉዞ መዘጋጀቱን የገዳሙ አስተባባሪ ኮሚቴ ዛሬ በሰጠው መግለጫ አስታውቋል፡፡
በምስራቅ ጎንደር ሙታንሳ ማር ቅዱስ ሚካኤል ገዳም በችግር ውስጥ ወድቀው ለነበሩ መነኮሳት 11 ሚሊዮን ብር እና በአይነት 1 ሚሊዮን 2 መቶ ሺህ በር መሰብሰብ መቻሉንም ኮሚቴው አስተውቋል፡፡
የገዳሙ የአዲስ አበባ ከተማ የሚዲያ አስተባባሪ ኮሚቴ አቶ ሙሉቀን አሰፋ፤ እነዚህ ድጋፎች የቤተክርስቲያን ዶግማና ቀኖና በጠበቀ መልኩ በተለያዩ የመገናኛ ብዙሃን እና ማህበራዊ መገናኛ ላይ በተሰራ የማስታወቂያ ስራ ነው ብለዋል።
ገዳሙን የመርዳት ዘመቻው ከተጀመረ አስራ አንድ ወር ሆኖታልም ሲሉ ተናግረዋል።

በመጀመሪያ ዙር በተሰበሰበ ገንዘብ 170 ሜትር ተራራ ተቦርቡሮ ለእናቶችም ለአባቶችም ለእንቅስቃሴ አስቸጋሪ የነበረው ቦታ በአርማታ ደረጃ ተሰርቶለት ለገዳማዊያን እንቅስቃሴ ምቹ እንዲሆን ተደርጓል ብለዋል።
በአካባቢው ምንም አይነት የመብራት አገልግሎት በላመኖሩ የሶላር መብራት ፣የእናቶች ቤት፣የማዕድ ቤት ፣ለገዳማዊያኑ የእደ-ጥበባት ውጤቶችን ማምረቻ የሼድ ግንባታ፣ የሸማ ስራ ሙያ እንዲሰለጥኑ በማድረግ ወደ ስራ እንዲገቡ በማድረግ ለስራው የሚያስፈልጉ መሳሪያዎች እና የጥሬ እቃ ግብዓቶችን የማሟላት ስራ ተሰርቷል ብለዋል።
ባለፉት ወራት በተለይ የእናቶችን ችግር ከመቅረፍ በኩል ሰፊ ስራ ተሰርቷል ያሉት ኮሚቴዎቹ ፤ በአባቶች በኩል የቅዱስ ሚካኤል ህንፃ ቤተክርስቲያን ግንባታን ጨምሮ ፣የአባቶች ቤት ግንባታ፣የአብነት፣ዓለማዊ ት/ቤት፣ እና የመጀመሪያ ደረጃ ጤና ጣቢያ ግንባታ ስራ ለማከናወን ገዳሙ እንቅስቃሴ መጀመሩ ገልጸዋል።
እነዚህን ስራዎች ከዳር ለማድረስ ከመጋቢት 25 እስከ ሚያዝያ ሁለት ቀን 2017 ዓ.ም ወደ ገዳሙ የበረከት ጉዞ መዘጋጀቱን ጠቁመዋል።
ጥቅምት 16 ቀን 2018 ዓ.ም በሚሊኒየም አዳራሽ ብፁዓን ሊቃነ ጳጳሳት እና ሊቃውንተ ቤተክርስቲያን በተገኙበት ታላቅ የገቢ ማሰባሰቢያ መርሃግብር ይዘጋጃል መባሉን ሰምተናል።
የገዳሙን እንቅስቃሴ በተመለከተ በዛሬው እለት በተሰጠ ጋዜጣዊ መግለጫ የምዕራብ ሃረርጌ ሀገረ ስብከት ሊቀ ጳጳስ ብፁዕ ወቅዱስ አቡነ እንጦስ እና የገዳሙ መነኮሳት እና መምህራነ ወንጌል ተገኝተዋል።
ለአለም አሰፋ
የካቲት 14 ቀን 2017 ዓ.ም
