ፕሬዚዳንት ዶናልድ ትራምፕ በጋዛ ያለውን ጦርነት ለማስቆም ዕቅድ ማዉጣታቸዉ ይታወሳል፡፡
በእስራኤል እና በሃማስ መካከል ያለውን ጦርነት ለማስቆም አላማውን አድርጎ በግብፅ እየተካሔደ በሚገኘው እና ሶስተኛ ቀኑን ባስቆጠረው ቀጥተኛ ያልሆነ ውይይት ላይ የአሜሪካ ከፍተኛ ልዑካን እና ባለስልጣናት መቀላቀላቸዉ ተገልጿል፡፡
ስቲቭ ዊትኮፍ እና የትራምፕ አማች ያሬድ ኩሽነር፤ ከኳታር ጠቅላይ ሚኒስትር እና የቱርክ የስለላ ሃላፊ ጋር በመሆን ሻርም ኤል ሼክ ይገኛሉ፤ ይህም ዉይይቱ ለዉጥ ማምጣት ይችል እንደሆነ የሚያመላክት ቁልፍ ቀን ይሆናል ተብሎ ይጠበቃል።
አንድ የሐማስ ከፍተኛ ባለስልጣን ለቢቢሲ በውይይቱ አስፈላጊው አዎንታዊነት መታየቱን ተናግረው፤ እስራኤል በጋዛ ለተያዙ ታጋቾች ምትክ መፍታት የምትፈልገውን የፍልስጤም እስረኞች ዝርዝር ቀርቧል ብለዋል፡፡
የእስራኤል መገናኛ ብዙኃን ባለሥልጣኖቹን ጠቅሰው፤ ጥንቃቄ የተሞላበት ብሩህ ተስፋ አለ ሲሉ ዘግበዋል።
ትራምፕ በበኩላቸው ፤አንድ ነገር ማድረግ የምንችልበት እውነተኛ ዕድል አለ ሲሉ መናገራቸዉን የቢቢሲ ዘገባ ያመላክታል፡፡
የኳታሩ ጠቅላይ ሚኒስትር ሼክ መሀመድ ቢን አብዱል ራህማን አልታኒ እና የቱርክ የስለላ ሃላፊ ኢብራሂም ካሊንም ውይይቱን መቀላቀላቸው ነዉ የተገለጸዉ፡፡
የሼክ መሀመድ የመገኘት አላማ፤ የጋዛን የተኩስ አቁም ዕቅድ እና ታጋቾችን የመልቀቅ ስምምነትን ወደፊት ለማራመድ ነው ሲሉ አንድ ባለስልጣን ለሮይተርስ የዜና ወኪል ተናግረዋል።
የቱርኩ ፕሬዝዳንት ሬሲፕ ጣይብ ኤርዶጋን በበኩላቸው ፤ ትራምፕ፤ ሃማስ ዕቅዳቸውን እንዲቀበል ለማሳመን በቅርቡ በስልክ ባደረጉት ንግግር ጠይቀውት ነበር ማለታቸዉ ተዘግቧል፡፡
ሀና ሰይፉ
መስከረም 28/2018 ዓ.ም
